logoblog

Cari

Tutup Iklan

Senggeger, Mantre, Owat Mujarab Batur Sasak

Senggeger, Mantre, Owat Mujarab Batur Sasak

Oleh: Lalu Pangkat Ali, S.IP Sedurung dewek ngaturan mukaddimah maring raga dane, dewek titiang puniki ngaturan agung agung sinampure maring raga

Budaya

Senggeger, Mantre, Owat Mujarab Batur Sasak

Senggeger, Mantre, Owat Mujarab Batur Sasak

Pangkat Ali
Oleh Pangkat Ali
15 Desember, 2016 12:42:34
Budaya
Komentar: 2
Dibaca: 127386 Kali

Sedurung dewek ngaturan mukaddimah maring raga dane, dewek titiang puniki ngaturan agung agung sinampure maring raga dane pengelingsir, sesepuh adat, sesepuh agama, moga mogi pengiringan dewek si ngaturan tulisan senggeger, mantra mantra lan senteguh niki, nenten dewek temenggahin lantaran manah dewek tulis senggeger, mantra mantra lan senteguh niki jari penginget tipaq ninik kakiq pelungguh eraq mudi.

Pelungguh wikan, mangkin niki zaman sampun berubah, ninik kakiq pelungguh nenten inik sadu lekan mantra mantra, lantaran zaman mangkin niki       nenten pade maraq zaman ninik kakiq pelungguh si julu. Mangkin niki, lamun araq bije jari pelungguh si sakit atawe sungkan lueq dokter lain beroat atawe bemedo, sementara ninik kakiq pelungguh si julu lamuna sungkan cukup isikna bemedo kadu mantra lantaran dokter waktu niki sanget sikna jarang.

Mantra mantra atawe jampi-jampi niki berupa ucapan-ucapan si sanget teyakini bedoe kekuatan gaib si bau atasi segala kesulitan. Hal niki lumrah te gaweq lantaran masih kurang gati penaoq sementara tuntutan idup niki beleq gati. Jampi-jampi niki eleq masyarakat suku Sasak Lombok tebagi jari 3 kelompok :

Senggeger

Senggeger niki  mantra atawe do’a si tebace adekna  batur lain atawe dengan  lain seneng atawe merase kasih lan sayang sesuai kayun si pembaca do’a, maraq senggeger adekna si tesayang atawe temeleq isiq dedare atawe bebalu (kekasih), senggeger adekna  laris dagangannya, dait masih lueq si lain.

Mantra-mantra  Pengobatan,

            Mantra atawe Jejampi pengobatan niki sejenis do’a si tebaca adekna selah lekan selapuq jenis penyungkan maraq misal jampi sakit bosang,  jampi bakat dait lueq gati silain

            Mantra mantra  (Pemeliharaan).

            Mantra atawe jejampi senteguh (pemeliharaan) niki sopoq mantra si tebace  adekte terlindung lekan segala macem mara bahaya serte selamat sampai tujuan, smaraq misal pemeliharaan lekan gegaman si tajam, pemeliharaan lekan serangan musuh, dait si lainan. Mantra mantra niki salaq sopoq kearifan lokal masyarakat Sasak eleq Lombok si mangkin niki sanget gati sikna kurang pengamalne lantaran keyakinan tipaq mantra mantra niki sanget kurang gati, mawinan niki sanget perlu didokumentasikan, diinventarisir adekna nenten telang jejak kesugihan budaya Lombok puniki. Kondisi niki nyaris pelungguh sami kehilangan mata rantai sejarah dait budaya si laeq. mawanan niki  pelungguh de tiang sangat penting berusaha melindungi kekayaan budaya niki.

Pada prinsipna mantra mantra niki nenten tesimpan eleq dalam bentuk tulisan melainkan dalam bentuk ingetan lekan pengelingsir atawe pengamal bahkan menurut sebagian pengamal, jarang gati tekadu. Hal niki si sorong penulis segera berbuat, meskipun dalem bentuk saq  sangat gati siqna sederhana.

Penyusunan mantra mantra niki, ngiring tulis jari pengingat atawe pelikat ninik kakiq pelungguh si mudi, adekna wikanan rue tadah kearifan budaya lokal ninik kakiqna si bejulu sekaligus jari acuan untuk penelitian lanjutan, khususna bidang sastra maupun sejarah  leq Lombok. Mudah mudahan pulih manfaat lekan bacaan niki. Amin

Senggeger Batur Sasak

Senggeger niki nenten tekayunan jari jejoraan, senggeger niki jati bau pelungguh kadu jari sengasih-asih adekna selapuq batur kasih sayang eleq raga pelinggih si genem ngamalan. Senggeger niki bau pinaq raga pelungguh jari solah gagah malik inges  siq  pelungguh teserminan isiq batur lain lamun pelungguh sami suke amalan senggeger niki. Mawinan niki daweg ngiring amalan ilmu niki moga mogi Allah lan Kuase ngicanin pelungguh sami cahye urif si mule jati. Dengan lapaz  Bismillahirrohmanirrohim dait ngiring tutup kadu berkah kalimah Lailahaillalloh Muhammadar Rasulullah. Dewek iring pelungguh sami amalan senggeger niki.

                           SENGGEGER BELE

                        ( Ta lepas langan batu kumbung )

Bismillahirrohmanirrohim

Allahummasholli Ala Sayyyidina Muhammad

Payungku, payung ape

Payungku, payung Allah

Jungkatku, jungkat ape

Jungkatku jungkat Muhammad

Teke olas, teke asih

Teke geger, teke girang ate matanbi laiq aku

Mapan aku ngadu senggeger bele Nabi Muhammad

Inget ................ aran musuhbi, adek bi kakoq gantoq atene jangke  lebur anyong sikna bekangen laiq aku

Berkat kalimah Lailahaillalloh Muhammadar Rasululloh

Carene te Jariq Dait Tekadu

           Senenten man pelungguh kadu senggeger niki, perlu pelungguh mandi telu kali sejelo, mulai lekan kelemaq rebo sampe kebian Jumat. Mandi kelemaq senenten man ngempok jelo, mandi tengari sewaktu jelo panjeng dait mandi kebian senenten man jelo serep. Pelungguh pandik senggeger niki eleq aiq si ngelek marak ntan eleq kokoh. Pelungguh baca senggeger niki telu kali eleq dalem aiq tanpa napas, terus pelinggih berosok ngadu daun jarak si kuning telu lembar bilang pelungguh mandi. Sesampun pelungguh pandik senggeger niki, eleq malem jum’at pelungguh sholat hajat dua rakaat. Seluaran pelungguh sholat magrib, terus pelungguh baca surat yasin telu kali, pelungguh niatan adekne senggeger niki bedoe guna mandi eleq raga pelungguh.

          Sesampun nike, baru pelungguh lepas senggeger niki langan batu kumbung, eleq batu kumbung niki pelungguh baca senggeger niki, terus pelungguh ampes lekan mudi sai jak taoq pelungguh berangen, bebalu maupun dedare, lamun bau engat pelungguh isiq bebalu atawe dedare saq pelungguh tuju niki, insya Allah dengan izin-Nya, bebalu atawe dedare nike langsung berangen eleq pelungguh secara spontan, laguq nenten pelungguh pinaq senggeger niki jari main main, lantaran lamune bau isiq senggeger niki nenten araq medona kecuali merariq, bauna pinaq bebalu dait dedare jari jogang berangen elek pelungguh.

         Silaq pelungguh coba senggeger niki gih ?

SENGGEGER MAYIT

( Te lepas langan galeng )

Kudodoq  mayit sinta boga

Asek  mayit dalam puri

Ures tokol mesaq mesaq

Kapong galeng inget aku

Teke raras teke asih

Ate jogang  mate meleng  gitaq  aku

Inget senggeger mayit  ......aran musuhbi

adekbi kakoq gantok atena jangka jogang sikna kangen aku

Berkat kalimah Lailahaillalloh Muhammadar Rasululloh

Carane Tekadu

Senggeger niki ta paran aran ilmu masak (sudah jadi), nenten perlu tepandik, karing pelungguh amalan atawe baca bilang waktu seluaran sholat wajib,si paling utama taoq pelungguh bace senggeger niki waktu magrib dait subuh te bace telu kali tanpa napas.

Carane te kadu, lamun araq hajat pelungguh eleq bebalu maupun dedare, pelungguh bau lepas senggeger niki eleq malem rebu, kamis dait jumat. Carane pelungguh nenten mesare bejulu, pelungguh antih bebalu atawe dedare saq pelungguh tuju niki juluan mesare. Kire kire jam sopok atawe jam dua, pelinggih bait aiq wuduk, galeng si nenten wah bekadu sopoq, terus pelinggih tumpang sila mbe jak andang bale babalu atawe dedare niki, pelungguh taruh galeng niki eleq   arep pelinggih si tumpang sile, terus pelinggih baca senggeger niki telu kali sambil pelinggih hayalan galeng niki adalah bebalu atawe dedare saq pelinggih tuju, selesai senggeger niki di bace baru pelinggih tepuk galeng niki telu kali,terus pelinggih penganjeng galeng niki eleq bawak cokor ( nae ) pelinggih si mesare.

Dengan izin Allah ta’ala Babalu atawe dedare sak pelinggih tuju niki uras secara tiba tiba langsung inget pelinggih sambilna nangis mele bedait.

( Inget senggeger niki ndarak medone kecuali merarik. Jangan sembarang dilepas)

SENGGEGER ANAK IWOK

( Ta lepas langan besalaman )

Bismillahirrohmaanirrohim

Eoq aeq- eoq aeq leq belide

Sing pelingkak bideng doang

Ngeoq ngaeq angenku eleq side

Sing penggitaqku side doang

Inget ............... aran musuhbi si makajuluk anak iwok bawaq sabo,

adekbi kakoq gantoq atena jangka lebur anyong siqna kangen aku.

Mapan aku ngadu senggeger anak iwok,.

Berkat Lailahaillallah Muhammadurrasulullah.

Carane Tejariq dait tekadu

Senenten man pelungguh kadu senggeger niki, perlu pelungguh mandi telu kali sejelo, mulai lekan kelemaq rebo sampe kebian Jumat. Mandi kelemaq senenten man ngempok jelo, mandi tengari sewaktu jelo panjeng dait mandi kebian senenten man jelo serep. Pelungguh pandik senggeger niki eleq aiq si nguner marak ntan eleq telaga atawe kokok. Pelungguh baca senggeger niki telu kali eleq dalem aiq tanpa napas, terus pelinggih berosok ngadu daun sabo si kuning telu lembar bilang pelungguh mandi. Sesampun pelungguh pandik senggeger niki, eleq malem jum’at pelungguh sholat hajat dua rakaat. Seluaran pelungguh sholat magrib, terus pelungguh baca surat yasin telu kali, pelungguh niatan adekne senggeger niki bedoe guna mandi eleq ragen pelungguh.

          Sesampun nike, baru pelungguh lepas senggeger niki langan besalaman. Sewaktu pelungguh besalaman, pelungguh baca senggeger niki, terus pelungguh goret tapak tangan dedare atawe bebalu nike kadu telunjuk pelungguh. Lamun bau nyerujut gading pelungguh ia tandane bau. Insya Allah dengan izin-Nya, bebalu atawe dedare nike langsung berangen eleq pelungguh secara spontan, laguq nenten pelungguh pinaq senggeger niki jari main main, lantaran lamuna bau isiq senggeger niki nenten araq medona, kecuali merariq, bauna minaq bebalu dait dedare jogang berangen elek pelungguh.     

SENGGEGER UMBAK BELAGA

( Ta lepas langan kemos )

Bismillahirrohmanirrohim

Allahummasholli Ala Sayyyidina Muhammad

Jukungku jukung ape,

 Jukungku jukung rasa

Angenku angen ape, angenku maraq umbak belage

Teka olas teka asih, ate matamu laiq aku

Mapan aku ngaduh senggeger si bejuluk umbak belaga

Inget ..................... aran musuhbi, adekne kakoq gantok atena   jangka lebur anyong sikna kangen aku                                                        

Berkat kalimah Lailahaillalloh Muhammadar Rasululloh

Carane Tekadu

         Senggeger niki ta paran aran ilmu masak ( sudah jadi ), nenten perlu tepandik, karing pelungguh amalan atawe baca bilang waktu seluaran sholat wajib, si paling utama taoq pelungguh baca senggeger niki waktu magrib dait subuh ta baca telu kali tanpa napas.

          Carana te kadu, lamun araq hajat pelungguh eleq bebalu maupun dedare, pelungguh bau lepas senggeger niki langan kemos. Carana waktu pelungguh betempuh kance bebabu atawe dedare saq taoq pelungguh berangen pelungguh kemosin bebalu atawe dedare niki sambil pelungguh baca senggeger niki dalem angen, sesampun selesai pelungguh baca baru pelungguh ngengos andang kanan semendak baruq pelungguh tegur sapa bebalu atawe dedare niki.

        Dengan izin Allah ta’ala Babalu atawe dedare sak pelinggih kemosin niki demen/ suke serminan pelinggih si kemos, sewaktu pelinggih bekelin atawe bepisah kance bebalu dait dedare niki pengemos pelinggih masih tetapne inget ia isiq bebalu atawe dedare niki, ia lantaranna berangen eleq pelinggih, sampe sampe ndekna tao tindok pidem, pengemos pelinggihde doang eleq julun matana bilang jelo malem.

  ( Inget senggeger niki ndarak medone kecuali merarik. Biasane lamuna bau isiq senggeger niki dengan nina kurus isik lelahna berangen, ndarak angenna mangan nginem, oleh sebab niki jangan sembarang dilepas)

 

SAHADAT FATIMAH

( Ta lepas langan bedak/ pupur, khusus wanita )

Bismillahirrohmanirrohim

Ne Fatimah duduk manis

Mas kencana dadi sonta

Ne  Mas kuning sari kembangku

Berkat kalimah Lailahaillalloh Muhammadar Rasululloh

Carane Tekadu

         Senggeger niki ta paran aran ilmu masak ( sudah jadi ), nenten perlu tepandik, karing pelungguh amalan atawe baca bilang waktu seluaran sholat wajib, si paling utama taoq pelungguh baca senggeger niki waktu magrib dait subuh ta baca telu kali tanpa napas.

          Carana te kadu, lamun pelungguh sugul lekan gedeng atawe bale pelinggih biasean dirik kadu bedak, senentenan pelinggih bebedak, pelinggih taruh bedak niki eleq gading kiri, baru peliggih bace mantra niki telu kali, baru pelinggih usap muka pelinggih ngadu bedak niki.

        Dengan izin Allah ta’ala muka pelinggih sugul cahya maraq bulan tanggal lima belas, puteq kuning isiqna serminan pelinggih isiq teruna bajang, muka pelinggih alus mulus marak timun odaq, mawinan niki lantaran teruna matunggal kayun dait pelinggih. Lamun dengan laki bau isik mantra niki ndekna mele bilin pelinggih, ia mele neket doang marak lentaq eleq pelinggih.

  ( Inget senggeger niki ndarak medone kecuali merarik. Biasane lamuna bau isiq senggeger niki dengan laki nekatna mele merarik kance pelinggih, jogang sikna berangen, ndarak angenna mangan nginem, pelinggihde doang eleq julun matane, dait angenna penok sesak isikna angelan pelinggih doang oleh sebab niki jangan sembarang dilepas)

SENGGEGER BEBEDAK

           ( Ta lepas langan bedak/ pupur, khusus wanita )

Bismillahirrohmanirrohim

Terongku kuning-kuning

Kutalet leq murin bare

Cahyengku puteq kuning

Maraq cahyen bijen bindara

Berkat kalimah Lailahaillalloh Muhammadar Rasululloh

Carane Tekadu

         Senggeger niki ta paran aran ilmu masak ( sudah jadi ), nenten perlu tepandik, karing pelungguh amalan atawe baca bilang waktu seluaran sholat wajib, si paling utama taoq pelungguh baca senggeger niki waktu magrib dait subuh ta baca telu kali tanpa napas.

          Carana te kadu, lamun pelungguh sugul lekan geding atawe bale pelinggih biasean dirik kadu bedak, senentenan pelinggih bebedak, pelinggih taruh bedak niki eleq gading kiri, baru peliggih bace mantra niki telu kali, baru pelinggih usap muka pelinggih ngadu bedak niki.

        Dengan izin Allah ta’ala muka pelinggih sugul cahya maraq bulan tanggal lima belas, puteq kuning isiqna serminan pelinggih isiq teruna bajang, muka pelinggih alus mulus marak timun odaq, mawinan niki lantaran teruna matunggal kayun dait pelinggih. Lamun dengan laki bau isik mantra niki ndekna mele bilin pelinggih, ia mele neket doang marak lentaq eleq pelinggih.

  ( Inget senggeger niki ndarak medone kecuali merarik. Biasane lamuna bau isiq senggeger niki dengan laki nekatna mele merarik kance pelinggih, jogang sikna berangen, ndarak angenna mangan nginem, pelinggihde doang eleq julun matane, dait angenna penok sesak isikna angelan pelinggih doang oleh sebab niki jangan sembarang dilepas)

SENGGEGER NABI DAUD

( Ta lepas langan suara )

Bismillahirrohmanirrohim

Allahumma Ahsan sauti

Kama ahsantu sautan Nabiyyuna

Muhammadin Sallahu’alaihi wassallam

Wanabi dawuda alaihi sala tuwas salam

Inget senggeger Nabi Daud ….aran musuhbi (nama yang dituju)

Kulepas langan suara

Adeqbi kakoq gantoq ate

Jangke lebur anyong

Siqne bekangen laiq aku

Berkat kalimah Lailahaillalloh Muhammadar Rasululloh

Caraen Tekadu

         Senggeger niki ta paran aran ilmu masak ( sudah jadi ), nenten perlu tepandik, karing pelungguh amalan atawe baca bilang waktu seluaran sholat wajib, si paling utama taoq pelungguh baca senggeger niki waktu magrib dait subuh ta baca telu kali tanpa napas.

          Carana te kadu, senentenan  pelungguh bebase pelungguh bace senggeger niki sekali, baru pelungguh bebaos.

        Dengan izin Allah ta’ala Selapuq batur, lebih lebih bebalu dedare senenng pirengan basen  pelinggih. Suara pelinggih si sampun bebase niki ia doang keringetan sampe bale sai juaq sak pelinggih niatan. Bilang jelo malem pelinggih tepiak angen isiq bebalu atawe dedare taok pelinggih berangen, jero matiqna bedait doang, senang lalokna pirengan suara pelinggih.

  ( Inget senggeger niki ndarak medone kecuali merarik. Biasane lamuna bau isiq senggeger niki dengan nina nekatna meta boyak pelinggihda ia mele merarik doang kance pelinggih, jogang sikna berangen, ndarak angenna mangan nginem, suara pelinggihde doang eleq telingana, dait angenna penok sesak isikna angelan pelinggih doang oleh sebab niki jangan sembarang dilepas)

SENGGEGER NABI YUSUF

                              ( Ta lepas langan kelantik lekoq )

Bismillahirrohmanirrohim

Maringku Muhammad

Maringku jambangan gedah
Murut muncar cahyengku

Maraq cahye Nabi Allah Yusuf

Berkat Lailahaillallah Muhammadurrasulullah

Teka olas teka Asih , pada olas pada asih

Ate matamu laik aku

Mapan aku ngadu senggeger si bejejuluk pujian bebeak Nabi  Allah Yusuf.

Inget ………aran musuhbi adekbi kakoq gantok atena jangka lebur anyong siqna kangen

Berkat kalimah Lailahaillalloh Muhammadar Rasululloh

Carane Tejariq dait Tekadu.

           Senentenan pelungguh kadu senggeger niki perlu pelungguh mandi telu kali sejelo mulai lekan kelemaq rebo sampe kebian Jumat. Mandi kelemaq senentenan ngempok jelo, mandi tengari sewaktu jelo panjeng dait mandi kebian senentenan jelo serep. Pelungguh pandik senggeger niki eleq aiq si ngelek marak ntan eleq kokoh. Pelungguh baca senggeger niki telu kali eleq dalem aiq tanpa napas, terus pelinggih berosok ngadu daun jarak si kuning telu lembar bilang pelungguh mandi. Sesampun pelungguh pandik senggeger niki, eleq malem jum’at pelungguh sholat hajat dua rakaat seluaran pelungguh sholat magrib, terus pelungguh baca surat yasin telu kali, pelungguh niatan adekna senggeger niki bedoe guna mandi eleq raga pelungguh.

          Sesampun niki baru pelungguh lepas senggeger niki langan kelantek lekoq, eleq kelantek niki pelungguh baca senggeger niki, terus pelungguh ampes lekan mudi sai jak taoq pelungguh berangen, bebalu maupun dedare, lamun bau engat pelungguh isiq bebalu atawe dedare saq pelungguh tuju niki insyaallah dengan izinya bebalu atawe dedare niki langsung berangen eleq pelungguh secara spontanitas, laguq nenten pelungguh pinaq senggeger niki jari main main lantaran lamuna bau isiq senggeger niki nenten araq medona kecuali merariq, bauna minaq bebalu dait dedare jogang berangen elek pelungguh.Silaq pelungguh coba senggeger niki gih ?

SENGGEGER PASANG  KELAMBI

                       ( Ongkat ta pasang buaq kelambi )

Bismillahirrohmanirrohim Nabi Allah Yusuf  aran  cahyaku

Bismillahirrohmanirrohim NabiAllah  Daud aran suaraku

Bismillahirrohmanirrohim Nabi Allah Sulaeman aran tandangku

Bismillahirrohmanirrohim, Nabi Allah Ibrahim aran awakku

Bismillahirrohmanirrohim, Nabi Allah Muhammad aran sempurne kejarianku.

Berkat kalimah Lailahaillalloh Muhammadar Rasululloh

Carane TekaduU

         Senggeger niki ta paran aran ilmu masak ( sudah jadi ), nenten perlu tepandik, karing pelungguh amalan atawe baca sewaktu pelinggih pasang kuwace.

          Carana te kadu, sewaktu  pelungguh pasang kuwace, pelungguh bace senggeger niki setiap memasukkan buaq kelambi, mulai lekan buaq kelambi si paling atas sampai si paling bawaq, pelungguh baca satu buah kelambi satu kalimat.

        Dengan izin Allah ta’ala Selapuq batur serminan pelungguh bepakaian sanget gati sikna rapi, lebih lebih bebalu dedare si taoq pelinggih berangen sanget gati sikna senenng serminan  pelinggih. rupa pelinggih bercahya, pantes dait inges, sai juaq sak serminan pelinggih selapuqna pada demen.

SENGGEGER BEGANG NYINJIT KEBANGO TANGGAQ

                     ( Ta lepas langan Galeng )

Bismillahirrohmanirrohim

Allahumma Aqtaena

Annamuye maffaena

Lebur anyong ateng kamu

Maraq beras jari tepung

Ujan rintis aiq metenbi

Maraq barat jauq ujan

Inget senggeger siq bejejuluk

Begang Nyinjit kebango tanggaq….aran musuhbi (nama yang dituju)

Berkat kalimah Lailahaillalloh Muhammadar Rasululloh

Carane Te jariq Dait Tekadu

           Senentenan pelungguh kadu senggeger niki perlu pelungguh mandi telu kali sejelo mulai lekan kelemaq rebo sampe kebian Jumat. Mandi kelemaq senentenan ngempok jelo, mandi tengari sewaktu jelo panjeng dait mandi kebian senentenan jelo serep. Pelungguh pandik senggeger niki eleq aiq si ngelek marak ntan eleq kokoh. Pelungguh baca senggeger niki telu kali eleq dalem aiq tanpa napas, terus pelinggih berosok ngadu daun jarak si kuning telu lembar bilang pelungguh mandi. Sesampun pelungguh pandik senggeger niki, eleq malam sabtu pelungguh sholat hajat langsung baca surat yasin sekali,

          Sesampun niki baru pelungguh lepas senggeger niki langan galeng, eleq galeng niki pelungguh bepesan adekna jauq awak bebalu atawe dedare taok pelungguh berangen niki pete boyaq pelinggih.terus galeng niki ya kadu pelinggih mesare, lamun araq dateng kembang malem, perasak dirik pelinggih bau kemanukan atawe binatang si lain, iya tanda bebalu atawe dedare niki bau isiq senggeger niki, insyaallah dengan izinya bebalu atawe dedare niki langsung pete boyak pelinggih tejauq isiq angen. laguq ilingan nenten pelungguh pinaq senggeger niki jari main main lantaran lamuna bau isiq senggeger niki nenten araq medona kecuali merariq, bauna minaq bebalu dait dedare jogang berangen elek pelungguh.

         Lamun pelinggih nenten percaye,silaq pelinggih coba senggeger niki  laguk onyaq ndak niatan seninaq batur doang gih ?

SENGGEGER MACAN KUNING

( Ta lepas langan rokok )

Bismillahirrohmanirrohim

Allahummasholli Ala Sayyyidina Muhammad

Rokokku rokok ape

Rokokku mas taji melele

Pendetku pendet ape,

Pendetku mas dadi ngarum arum

Gigiku tereng repoq

Mapan aku kadu sengggeger si bejejuluk Macan Kuning

Berkat kalimah Lailahaillalloh Muhammadar Rasululloh

Inget .................... aran musuhbi, adekbi kakoq gantok atena jangka lebur anyong sikna kangen aku.

Berkat Lailahaillallah Muhammadurrasulullah.

CARANA TEKADU

         Senggeger niki ta paran aran ilmu masak ( sudah jadi ), nenten perlu tepandik, karing pelungguh amalan atawe baca bilang waktu seluaran sholat wajib, si paling utama taoq pelungguh baca senggeger niki waktu magrib dait subuh ta baca telu kali tanpa napas.

          Carana te kadu, senentenan  pelungguh pelungguh lumbar midang pelungguh sugulan rokok lekan bungkusna jumlahna ganjil, mulai lekan 3, 5, 7, 9, pelungguh bace senggeger niki sekali, baru pelungguh tiup rokok niki.sesampe pelungguh eleq gedeng bebalu atawe dedare si taoq pelungguh berangen baru pelungguh ngelanjar, usahakan pendet rokok niki adekna bau ambuq ye isiq bebalu atawe dedare niki.

        Dengan izin Allah ta’ala bebalu dedare taok pelinggih berangen niki langsung berangen dait cinta eleq pelinggih.

  ( Inget senggeger niki ndarak medone kecuali merarik. Biasane lamuna bau isiq senggeger niki dengan nina nekatna meta boyak pelinggihda ia mele merarik doang kance pelinggih, jogang sikna berangen, ndarak angenna mangan nginem, pelinggih  doang penggitan, dait angenna penok sesak isikna angelan pelinggih doang oleh sebab niki jangan sembarang dilepas)

DO’A MANDI

                                                ( ta baca eleq aiq saq ngelek )

Bismillahirrohmanirrohim

Tabeq-tabeq mas baginda hilir

Banyu suci, badan suke, jiwa sempurna

Berkat Lailahaillalloh Muhammadar Rasululloh

 

DO’A MANDI

                      ( ta baca eleq aiq saq nguneng )

Bismillahirrohmanirrohim

Tabeq-tabeq mas baginda huneng

Banyu suci, badan suke, jiwa sempurna

Berkat Lailahaillalloh Muhammadar Rasululloh

CARANA TEKADU

         Senentenan pelungguh pandiq ilmu atawe senggeger, pelungguh perlu gati betabeq tipak Nabi si jagak aiq niki adekna sak sempurna kejarian ilmu atawe senggeger pelungguh.

          Pelungguh baca do’a niki terus pelungguh kibas aik si ngelek niki telu kali, baru pelungguh bejarup telu kali, sesampun niki baru pelungguh nyelem eleq aiq si ngelek sambil pelungguh baca ilmu atawe senggeger pelungguh eleq dalem aiq. Insyaallah berkat ijinnya ilmu atawe senggeger pelungguh tejarian mandi.

MANTRA  PENGOBATAN

Mantra pengobatan adalah sejenis do’a yang dihajatkan agar disembuhkan dari segala jenis macam penyakit. Biasanya jampi-jampi ini, selain diucapkan juga ditambahkan bahan-bahan dari akar, batang dan daun tumbuh-tumbuhan atau bahan makanan. Adapun jampi-jampi pengobatan sebahagiannya antara lain,

MANTRA  PENGOT

Bismillahirrohmanirrohim

Allohummasolli’ ala Sayyidina Muhammad

Sak erat, Dua erat

Sak erat, Dua erat

Sak erat, Dua erat

Mandi mantrangku

Nane ku pelomboq pengot loq/laq ….siq kiri tipak siq kanan (kalau di kiri)

Nane ku pelomboq pengot loq/laq ….siq kanan sipak siq kiri (kalau di kanan)

(setelah itu aiq kembang di usap ke arah 7 x)

CARANA TA KADU

       Lamuna araq kanak kodeq atawa dengan toaq si te dait isiq penyakit pengot lantaran pekedekan batur, atawe sampun ta sapaq isiq bakeq beraq atawa Jin siluman Pelungguh baca mantra niki eleq aiq si sampun tecampur kance kembang 7 warna atawa kembang rampe. Kembang niki ta tangkaq kadu kemeq kodeq sak ndekna wah tekadu. Carana Pelinggih baca mantra niki langsung pelinggih tiup eleq taokna si pengot. Lamuna pengot aning kiri pelinggih tiup aning kanan, lamuna pengot aning kanan pelinggih tiup aning kiri. Sesampun niki pelinggih baca mantra niki malik eleq kembang 7 warna niki, kembang niki isiq pelinggih pandiq kanaq atawa dengan si pengot niki.. Insya Allah dengan izin Allah si Kuase penyakit pengot niki langsungna telang.

MANTRA  TINJOT

Bismillahirrohmanirrohim

Allahummasholli Ala Sayyyidina Muhammad

Tekupeq,Tekupeq,TekupeqTengaq bangket

Adekne uleq tipaq semangat

Mandi mantrangku jampi tagetBerkat kalimah Lailahaillalloh Muhammadar Rasululloh

MANTRA  TINJOT

Bismillahirrohmanirrohim

Allahummasholli Ala Sayyyidina Muhammad

Wa’ala a Lissayyidina Muhammad

Telek upeq ,Telek upeq

Komboq tengaq bangket

Nyrek uleq,Nyrek uleq

Besopoq jari semangat Berkat kalimah Lailahaillalloh Muhammadar Rasululloh

CARANA TA KADU

       Lamuna araq kanak kodeq atawa dengan toaq si te dait isiq penyakit tinjot lantaran tebilin mate isiq dengan toakna, atawa tebilin merariq isiq berayana, atawa wahna gitaq dengan belanggaran dait silainan terusna tinjot kembelas, coba sida popot ia sambilda baca mantra niki. Sesampun mantra miki luaran ta baca langsung pelungguh tiup semangatna sambilda pugut atawa antut atawa pugut bulu semangetna. Insya Allah dengan izin Allah si Kuase penyakit tinjot niki langsungna telang.

MANTRA  NGANAK

Bismillahirrohmanirrohim

Allohummasolli’ ala Sayyidina Muhammad

Ku lalo aneng sapit

Aiq ngempol leq sembawa

Leq bao taoqne sakit

Ne ke jembol aneng bawaq

Berkat kalimah Lailahaillalloh Muhammadar Rasululloh

MANTRA  NGANAK SI KENA SEKANCING

Bismillahirrohmanirrohim

Allohummasolli’ ala Sayyidina Muhammad

Allohummasolli’ ala Sayyidina Muhammad

Allohummasolli’ ala Sayyidina Muhammad

Sekanceng ,Sekanceng ,Sekanceng

Sekanceng ,Sekanceng ,Sekanceng

Sekanceng ,Sekanceng ,Sekanceng

Bukaq gedung,Gumi betekep

Berkat kalimah Lailahaillalloh Muhammadar Rasululloh

CARANA TA KADU

       Lamuna araq dengan betian si dateng bulan na nganak, terus ia sulit gati sugul anakna, silaq pelungguh baca mantra niki. Carana ta kadu sadangan aiq puteq si baru tebait lekan sumur takaq gelas, terus  pelungguh baca mantra niki, sesampun selesai ta baca pelungguh tiup aiq eleq gelas niki, terus pelungguh suruq dengan sibetian niki inem aiq niki setenge gelas sisana niki ya kaduna raput tian. Insya Allah dengan izin Allah si Kuase langsungna dateng leteng si beleq si mele nyugulan kanaq niki.

MANTRA KANAK NANGIS

Bismillahirrohmanirrohim

Baca Juga :


Allohummasolli’ ala Sayyidina Muhammad

Tunjang besi, Tunjang kemolong

Aku lengan sedin kemorong, Side lengan tengaq kemorong

Berkat kalimah Lailahaillalloh Muhammadar Rasululloh

MANTRA  KANAK KEMBOQ

Bismillahirrohmanirrohim

Allahummasholli Ala Sayyyidina Muhammad

Wa’ala a Lissayyidina Muhammad

Due telu  pempang bagek,Sopok bedande belek

Dua telu bijan bakeq,Sopok denganku bekedeq

Berkat kalimah Lailahaillalloh Muhammadar Rasululloh

MANTRA  KANAK SEKAT TINDOQ

Bismillahirrohmanirrohim

Allahummasholli Ala Sayyyidana Muhammad

Wa’ala a Lissayyidina Muhammad

Manuk ngungkung dingeri arak due

Kutalet nunjem-nanjem

Ne maiq isikne pedem Laq/Loq….

Ndak ne dateng siq sundem sandem ngiraq ye

Berkat kalimah Lailahaillalloh Muhammadar Rasululloh

MANTRA BEPOPOT

Bismillahirrohmanirrohim

Allahummasholli Ala SayyyidIna Muhammad

Boroq terep beserendi,

Moroq ngerep maraq manik Nabi

Berkat kalimah Lailahaillalloh Muhammadar Rasululloh

CARANA TA KADU

       Lamuna araq bija jari pelungguh si sekat gati tao tindoq, atawa girangna nangis suran bian, atawa girangna kemboq jangka inaqna nenten tao gaweq pegawean si lain, coba pelinggih popot bija jari niki kadu mantra niki. Carana pelinggih bait kesuna        ( bawang putih ) si nunggal, kesuna niki pelinggih bacaan mantra niki, terus pelinggih popot bije jari pelinggih. Sesampun selesai ta popot pelinggih sembeq embet kadu kesuna niki mulai lekan semangetna tipaq mudi, terus dadana tipaq puset, terus jejengkuna tipaq lampak nae, selapukna tesembeq embet eleq bagian kiri. Insya Allah dengan izin Allah si Kuase langsungna bije jari niki isah maliq maraq biase.

MANTRA  TINDOQ

Bismillahirrohmanirrohim

Mas muncar jari tiperku, Mas batu jari galengku

Mas karang jari dindingku,Berdiri Allah Ta’ala

Berduduk Nabi Muhammad Sallallohualaihi Wassalam

Berkat Lahaulawala Quwwataillabillahill AliyyulAzim

Zat Allah Sifat Allah Qudrat Allah

Ndarak Menang selainan Allah

MANTRA  SAKIT TIAN

Bismillahirrohmanirrohim

Allahummasholli Ala Sayyyidina Muhammad

Wa’ala a Lissayyidina Muhammad

Tuq teng tuq teng, Ijuk taline

Nyeri siq benceng, Entut jarine

Basong buntung teme repok, Buit bucung ndekna kemboq

Krotok leq jebak, Baun todok de saq melak

Berkat kalimah Lailahaillalloh Muhammadar Rasululloh

MANTRA  SAKIT TIAN

Bismillahirrohmanirrohim

Allahummasholli Ala Sayyyidina Muhammad

Wa’ala a Lissayyidina Muhammad

Antap beleq,Antap kodeq ,Ijuk taline,

Kamu siq mintuq beleq,

Mintuk kodek ,Entut jarine

Berkat kalimah Lailahaillalloh Muhammadar Rasululloh

MANTRA  SAKIT TIAN

Bismillahirrohmanirrohim

Allahummasholli Ala Sayyyidina Muhammad

Wa’ala a Lissayyidina Muhammad

Tuk Teng ,Tuk Teng

Ijuk Taline,Tianku siq seduq leteng

Entut jarine,Jampi mintuk jarine

Berkat kalimah Lailahaillalloh Muhammadar Rasululloh

CARANA TAKADU

Pelungguh baca mantra niki eleq tian dengan atawa kanaq si sakit terus da tiup lekan puset/ puserna tipaq bawaq sambil pelinggih urut tian niki adeng adeng Insyaalah dengan izin Allah SWT sakit tian niki becatna telang..

MANTRA KOTONG

Bismillahirrohmanirrohim

Allahummasholli Ala Sayyyidina Muhammad

Wa’ala a Lissayyidina Muhammad

Kedebong Kedebes,Api Nyale  Tia Daye

Ne Embong Ne Empes, Ne Pedaq Maraq Api Siq Nyale

Berkat kalimah Lailahaillalloh Muhammadar Rasululloh

CARANA TAKADU

       Pelinggih baca mantra niki  eleq dengan atawa kanak si tedait isiq luka terbakar bagian awaqna kemudian pelinggih tiup eleq taoqna si kena motong niki. Insyaallah dengan izin Allah SWT luka yang dialami akan segera sembuh

MANTRA  BAKAT

Bismillahirrohmanirrohim

Allahummasholli Ala Sayyyidina Muhammad

Wa’ala a Lissayyidina Muhammad

Pet pet gedeng lemokeq, adeqna Ripet marak si ngonek

Berkat kalimah Lailahaillalloh Muhammadar Rasululloh

MANTRA  BAKAT

Bismillahirrohmanirrohim

Allahummasholli Ala Sayyyidina Muhammad

Sekinyiq sekanyaq,Tembakau buaq pamaq

Lamunna iniq gamaq, adeqna rapet maraq si ngonek

Berkat kalimah Lailahaillalloh Muhammadar Rasululloh

CARANA TAKADU

       Pelinggih baca mantra niki eleq dengan atawa bije jari pelinggih  si kenaq luka / bakat isiq senjata tajam maraq misal ladiq, awis, bateq atawa barang tajam si lain .Insyaallah dengan izin Allah SWT  bakat niki becatna selah atawa tumbuh.

MANTRA  POLAK

Bismillahirrohmanirrohim

Allahummasholli Ala Sayyyidina Muhammad

Wa’ala a Lissayyidina Muhammad

Uwat betemu uwat,Lendong betemu lendong

Isi betemu isi,Tolang betemu tolang

Sudi mandi mantera polak

Berkat kalimah Lailahaillalloh Muhammadar Rasululloh

MANTRA  SAKIT GIGI

Bismillahirrohmanirrohim

Allahummasholli Ala Sayyyidina Muhammad

Wa’ala a Lissayyidina Muhammad

Ulat lante,Gawah juring

Ulet mate,Batah nguring

Berkat kalimah Lailahaillalloh Muhammadar Rasululloh

CARANA TAKADU

Mantra niki ta baca eleq batur atawa bija jari pelinggih si sakit gigi, terus pelinggih tiup gigi si sakit niki. Insyaallah dengan izin Allah SWT becatna selah

MANTRA  JIN

Bismillahirrohmanirrohim

Allahummasholli Ala Sayyyidina Muhammad

Wa’ala a Lissayyidina Muhammad

Ambil lampin anak kecil yang kena sandikala kemudian baca ….

Bismillahirrohmanirrohim

Sioq manuk puteq laloq uleq ,Sioq manuk puteq laloq uleq

Sioq manuk puteq laloq uleq ,Setelah itu dibuang lampin

Berkat kalimah Lailahaillalloh Muhammadar Rasululloh

CARANA TAKADU

         Mantra niki ta baca eleq bija jari pelinggih si tasapaq isiq bangsa jin. Carana pelinggih tiup semangetna sambilna si ta popot.. Insyaallah dengan izin Allah SWT bija jari niki becatna selah.

MANTRA  PIRIQ JIN SILUMAN

Bismillahirrohmanirrohim

Allahummasholli Ala Sayyyidina Muhammad

Wa’ala a Lissayyidina Muhammad

Ku rurut tandan kueq,Belatung atas langan

Ndak de  turut aku ulek, de atong aku  entah langan

Berkat kalimah Lailahaillalloh Muhammadar Rasululloh

CARANA TAKADU

          Mantra niki ta baca tipaq bija jari pelinggih si sakit lantaran jin siluman si ndekta serminan. Carana pelinggih tiup semangetna sambil pelinggih popot. Insyaallah dengan izin Allah SWT bija jari pelinggih becatna selah

MANTRA  BAKEQ BERAQ

Bismillahirrohmanirrohim

Allahummasholli Ala Sayyyidina Muhammad

Kulhu geni,Bise bisu

Rohiku belehing geni,Penimbal akan setan

Setan mare, setan mati,Singa mare, singe mati

Jelme mare, jelme mati,Jin mare, jin mati

Iblis mare, iblis mati,Ia mare, ia mati

Ajilake sateruning Allah,Insya Allah kalamullah, takbirulloh

Nede sire berkat Lailahaillalloh 

Nede sire pangeran Allah, Muhammadar Rasulullah

CARANA TAKADU

Mantra niki ta baca jari amalan pelinggih bilang jelo. Insyaallah dengan izin Allah SWT Pelinggih jaoq eleq selapuq macem gangguan bangsa jin siluman dait setan si mele ganggu pelinggih.

MANTRA BAKEQ

Bismillahirrohmanirrohim

Allahummasholli Ala Sayyyidina Muhammad

Wa’ala a Lissayyidina Muhammad

Due telu pempang bagek,Arak sekeq pempang cemara

Due telu bijen bageq,Inaqne taoq te ngendeng aseq

Berkat kalimah Lailahaillalloh Muhammadar Rasululloh

CARANA TAKADU

       Mantra niki ta baca terus menerus jari amalan pelinggih. Insyaallah dengan izin Allah SWT Pelinggih jaoq eleq selapuq jin siluman dait bakeq beraq si mele ganggu pelinggih.

MANTRA  PENJAGAQ AWAQ

Mantra penjagaq awaq niki  (pemeliharan) adalah sejenis do’a  lamun ta baca dengan keyakinan penuh pada Allah yang kuase ican pelinggih perlindungan, maka pelinggih akan selalu tejao’an lekan selapuq jenis marabahaya serta selamat mencapai tujuan maraq misal jagaq awaq lekan senjata tajam, jagaq awaq lekan serangan musuh, dan sebagainya.. maraq niki ruen mantra penjagaq awaq 

MANTRA  SENTEGUH

Bismillahirrohmanirrohim

Allahummasholli Ala Sayyyidina Muhammad

Neng neng jeti Lampaning gumi

Sepi sekumpuning Allah

Gumi suwung te pengucap

Berkat kalimah Lailahaillalloh Muhammadar Rasululloh

MANTRA  SENTEGUH

Bismillahirrohmanirrohim

Allahummasholli Ala Sayyyidina Muhammad

Masjuq aran mate, Mas Sinter aran ate

Kebon talo aran tian, Ruk - ruk – ruk

Inget sejayeng musuh, Mapan aku bejejuluk macan laut

Berkat kalimah Lailahaillalloh Muhammadar Rasululloh

CARANA TAKADU

Mantra ini diamalkan terus menerus pagi dan petang. Insyaallah dengan izin Allah SWT kita akan terhindar dari serangan musuh dan senjata tajam yang digunakan.

MANTRA  SENTEGUH

Bismillahirrohmanirrohim

Allahummasholli Ala Sayyyidina Muhammad

Wa’ala a Lissayyida Muhammad

Kulhu geni ,Bisu bisa

Setan marah, setan mati

Angin marah, angin mati

Jin marah, Jin mati

Berkat kalimah Lailahaillalloh Muhammadar Rasululloh

CARANA TAKADU

Mantra ini dibaca terus menerus dan menjadi amalan setiap saat. Insyaallah dengan izin Allah SWT segala jenis gangguan akan dapat diatasi dengan mudah

MANTRA TOLAK BEDIL

Bismillahirrohmanirrohim

Allahummasholli Ala Sayyyidina Muhammad

Kun kata Adam, Kun kata Insan

Kun kata Allah, Ya hu’….ya hu’….ya hu’…..

Bike namaku Nabi, Ya kun…..ya kun……ya kun….

Lahaulawakuwwatailla Billahil Aliyyul Azim

CARANA TAKADU

Mantra niki ta amalan terus menerus kelemaq kebian. Insyaallah dengan izin Allah SWT pelungguh sami tejau’an lekan selapuq macem peluru dait senjata tajam.

MANTRA  KEKELAMPAN

Bismillahirrohmanirrohim

Allahummasholli Ala Sayyyidina Muhammad

Wa’ala a Lissayyida Muhammad

Inangku leq julu, Amaqku leq mudi

Allah Ta’ala leq atasku, Kiraman Ketibin leq kiri kananku

Berkat kalimah Lailahaillalloh Muhammadar Rasululloh

CARANA TAKADU

 Mantra ini dibaca setiap kita akan bepergian kemanapun dan jampi-jampi tersebut sebagai wujud rasa berbakti dan ingat kepada jasa orang tua yang tellah melahirkan kita. Insyaallah dengan izin Allah SWT, kita akan selamat dalam perjalana

MANTRA SEMPUTER TUSELAQ

Bismillahirrohmanirrohim

Allahummasholli Ala Sayyyidina Muhammad

Rebute rebate, Setan sekilat

Segare jilendang, Lendang Jisegare

Sudi mandi mantren sempur

Berkat kalimah Lailahaillalloh Muhammadar Rasululloh

CARANA TAKADU

Mantra ini dibacakan kepada orang yang ingin berbuat jahat kepada kita seperti maling atau musuh yang akan mengganggu kita. Insyaallah dengan izin Allah SWT, maka musuh atau maling yang akan mengganngu tidak tahu arah akan mau kemana, bahkan pulangpun tidak bisa jika tidak diantarkan oleh orang yang telah diganggu

MANTRA  TUSELAQ

Bismillahirrohmanirrohim

Allahummasholli Ala Sayyyidina Muhammad

Bud bumi, Bud bumi

Sirerep hinayang , Sikep Umar Maye atas kejadian kowok aiq

Berkat kalimah Lailahaillalloh Muhammadar Rasululloh

CARANA TAKADU

Mantra ini dibacakan kepada tuselaq (leak) ketika mengucapkan bud bumi, bud bumi sambil menghentakkan kaki ke tanah (bumi). Insyaallah dengan izin Allah SWT, maka senjerit yang dimiliki tidak akan berlaku dan kembali seperti manusia biasa

MANTRA SEMPALIK

Bismillahirrohmanirrohim

Allahummasholli Ala Sayyyidina Muhammad

Allahumma palik pate, Sum suman mupate palik

Bisu mepalik yaum

Berkat kalimah Lailahaillalloh Muhammadar Rasululloh

CARANA TAKADU

Mantra tersebut di atas do pakai ketika ada orang berniat jahat kepada kita.  Insyaallah dengan izin Allah SWT, maka segala niat jahat yang ditujukan kepada kita akan kembali kepada yang melakukannya

MINYAK GUNA DAIT SEMBEQ

Minyak Guna dait sembeq niki  (pemeliharan) adalah sejenis Minyak dait sembeq  lamun ta colet serta tapada yakin tipaq Allah saq kuase ican pelinggih guna mandi, maka pelinggih pulih kewibawa’an saq luar biasa selapuq batur laki bini pada suke serminan pelinggih. maraq niki aran minyak si araq eleq Gumi Sasak  puniki.

PELOR EMAS

Minyak si bejejuluk pelor emas niki luar biase mandina terutama eleq batur bajang, lamun dedare bau isiq minyak niki nenten araq medona, merariq doang jari medona.

Minyak niki araq eleq gili Gede, lamun pelinggih kayun bedoe minyak niki silaq ngiring boyak eleq Gili Gede.

DEN TERUNA BAYAN

Minyak  si bejejuluk Den Teruna Bayan niki  bau ta sebut minyak seribu hajat lantaran selapuq taona bau bekadu, jari sikta bau dedare, jari senteguh, dait jari siqta ngobatin selapuk macem penyakit.

Minyak niki araq eleq Bayan, lamun pelungguh kayun bedoe atawa gisi minyak niki silaq pelinggih lumbar bayan boyak minyak niki eleq berugak agung bayan ye taoqna tesimpan.

MINYAK DUYUNG

   Minyak Duyung lueq macemna dait jejulukna, Araq si bejejuluk Duyung Menangis, Putri Duyung, araq maliq si bejejuluk Umbak belage macan kuning turun tangis dait lueq jejuluk silainan. Minyak duyung niki tebait eleq duyung saq berotak manusia berawak empaq, minyak duyung si asli sanget sikna sekat tedait lantaran jejari’anna si sekat gati.

   Minyak duyung niki bau tekadu isiq ta bau dedare atawe teruna, sai sai bakat isiq minyak duyung wajibna nangis isiqna kangen berayana, dait pasti yaqna bekangen seumur irupna.Minyak duyung niki bau pelinggih peta boyaq eleq batur si bebale elq pesisi.

KECIAL KUNING

 Minyak  si bejejuluk Kecial Kuning niki  bau ta sebut minyak murni siqta bau dedare. Sai sai bau isiq minyak niki nenten araq angen na bekakelan berayana doang si penggitan, ye mawanan jangke kurus bideng siqna angenan berayana doang.           

Minyak niki araq eleq Sakra, lamun pelungguh kayun bedoe atawa gisi minyak niki silaq pelinggih lumbar  Sakra boyak minyak niki ye taoqna tesimpan.

SEPAN ANDOS

Minyak sepan andos niki luar biasa khasiatna terutama eleq batur si bajang angen lantaran sai sai kadu minyak niki asalna pulih berandosan doang kance taoqna si berangen langsung na bau dait beleq gati angenna. Minyak niki sulit gati jejari’anna ye mawanan minyak niki sulit tedait.

Lamun pelungguh kayun gisi minyak niki, bau pelungguh boyak niki eleq Sakra, ya taoqna tasimpen, laguq onyak onyak ndak sembarang taokda kadu minyak niki lantaran teruna atawa dedare asalna bau isiq minyak niki langsungna betenaq merariq, lamun na ndek te bait ya langsung jogang gile, ya mawanan ampokna ndek kanggo sembarang taokna tekadu.

SEMANTAQ BARES

   Minyak si bejejuluk semantaq bares niki, minyak guna si luar biasa khasiatna terutama eleq batur si bajang angen lantaran sai sai kadu minyak niki asalna bau doang  kena  taoqna si berangen langsung na betejak merariq. Minyak niki sulit gati jejari’anna ye mawanan minyak niki sulit tedait.

Lamun pelungguh kayun gisi minyak niki, bau pelungguh boyak niki eleq Suradadi ya taoqna tasimpen, laguq onyak onyak ndak sembarang taokda kadu minyak niki lantaran teruna atawa dedare asalna bau isiq minyak niki langsungna betenaq merariq, lamun na ndek te bait ya langsung jogang gile, ya mawanan ampokna ndek kanggo sembarang taokna tekadu.

PUTRI NGAYAP

Minyak si bejejuluk Putri Ngayap niki, minyak guna si luar biasa khasiatna terutama eleq batur si bajang angen lantaran sai sai kadu minyak niki langsung teserminan becahya maraq ruen bulan tanggal lima olas, ye mawanan teruna atawa dedare asalna bau doang  kena  taoqna si berangen langsung na ndek ketaon idap rasana isiqna berangen.

Lamun pelungguh kayun gisi minyak niki, bau pelungguh boyak niki eleq Suradadi ya taoqna tasimpen, laguq onyak onyak ndak sembarang taokda kadu minyak niki lantaran teruna atawa dedare asalna bau isiq minyak niki langsungna betenaq merariq, ya mawanan ampokna ndek kanggo sembarang taokna tekadu.

MACAN KUNING SEGARE MUNCAR

Minyak si bejejuluk Macan Kuning Segare Muncar niki, minyak guna nenten araq tandinganna, minyak niki khusus jari kekaduan batur si bajang angen lantaran sai sai kadu minyak niki isiqna bau dedare atawa teruna, lamun na kenaq langsung kuning siqna serminan pengaken, nenten araq angenna bekakenan lantaran berayana doang eleq julu

Lamun pelungguh kayun gisi minyak niki, bau pelungguh boyak niki eleq Gili Maringkeq ya taoqna tasimpen, laguq onyak onyak ndak sembarang taokda kadu minyak niki lantaran teruna atawa dedare asalna bau isiq minyak niki langsungna betenaq merariq lantaran ndekna taoq angen na, ya mawanan ampokna ndek kanggo sembarang taokna tekadu.

SEMBEQ

Sembeq niki berupa pinyang si nomor sopoq khasiatna. Sembeq niki asli peninggalan Almarhum Ninik Tuan Guru Isah Pengangkut. Sembeq niki asalna bau te andos doang langsung na berangen teruna atawa dedare.

Lamun pelungguh kayun gisi sembeq niki, bau pelungguh boyak niki eleq Pengangkut eleq Guru Bangke ya taoqna tasimpen, laguq onyak onyak ndak sembarang taokda kadu sembeq niki lantaran teruna atawa dedare asalna bau isiq sembeq niki langsungna betenaq merariq lantaran ndekna taoq angen na, ya mawanan ampokna ndek kanggo sembarang taokna tekadu. [] - 01



 
Pangkat Ali

Pangkat Ali

Save Our Gumi Paer...LOMBOK Lalu Pangkat Ali, kesehariannya sebagai ASN -Pejabat Fungsional Pranata Humas Permkab.Lobar. Tinggal di Desa Kopang-Lombok Tengah. CP & WA: 081907941070. Fb: Fotografer Kopang & Eliza Agniya

Artikel Terkait

2 KOMENTAR

  1. Pangkat Ali

    Pangkat Ali

    02 Februari, 2017

    Sanak Jumaah Esha........Ngiring, paosante juluq senggeger jepang nike....


  • jumaah esha

    jumaah esha

    01 Februari, 2017

    bang pangkat... tiang jak laek girang tekadu senggeger jepang,,,, laguk kanak nane jak senggeger korea ye kadun... arane senggeger ji sam sung... hehe


  •  
     

    TULIS KOMENTAR

    Silahkan Login terlebih dahulu untuk mengisi komentar.
     
    Copyright 2008 - 2017 | kampung-media.com. All rights reserved.
     
    Tutup Iklan